काठमाडौ/नेकपा(एकीकृत समाजवादी) का अध्यक्ष माधवकुमार नेपालले क्रान्तिकारी पार्टीको मूल ध्येय भनेको नै नेपाली समाजको सही विश्लेषण गर्नु रहेको बताउनु भएको छ ।
शनिबार पार्टी कार्यालय आलोकनगरमा नेपाल तामाङ संघ समाजवादीको राष्ट्रिय भेलालाई सम्बोधन गर्दै अध्यक्ष नेपालले जातीय धार्मिक भाषा धर्म संस्कार र संस्कृतिका धनी हामी नेपालीहरुले सबैलाई संयोजन गरेर एउटै मालामा उन्नु जरुरी रहेको बताउनु भयो ।
यी हाम्रा धर्म संस्कृति संस्कारको संरक्षण गर्नु हामी सबैको दायित्व भएको भन्दै नेपालको संविधानले समेत सबै जात जाति वर्ग र क्षेत्रको पहिचानलाई सम्बोधन गरेको बताउनु भयो ।
उहाँले तामाङ समुदायको आफ्नै धर्म संस्कार र संस्कृति भएको भन्दै नेपाली इतिहासमा तामाङ समुदायको भूमिका उल्लेख्य भएको बताउनु भयो । उहाँले आफ्नै कार्यकालमा तामाङ,मधेसी र महिलालाई नेपाली सेनामा सहभागि गराउने कार्य भएको समेत बताउनु भयो ।
नेपाल आदिवासी जनजाति महासंघ समाजवादीको घटक संगठन नेपाल तामाङ संघ समाजवादीको अध्यक्षमा लाप्साङ तामाङ चयन हुनु भएको छ ।
शनिबार नेकपा(एकीकृत समाजवावदी) को केन्द्रीय कार्यालयमा भएको भेलाले तामाङको अध्यक्षतामा ७७ सदश्यीय केन्द्रीय कमिटीको समेत चयन गरेको हो । कमिटीको उपाध्यक्षमा वीरबहादुर तामाङ, रामदेवी तामाङ, इमान गोले, सरिता पाख्रिन र गौतम बुद्ध लामा चयन हुनुभएको छ ।
त्यस्तै महासचिवमा किरण मोक्तान चयन हुनुभयो भने रेशम तामाङ, कुन्साङ तामाङ, डेनो थिङ र लोकबहादुर तामाङ सचिवमा चयन हुनुभयो । कोषाध्यक्षमा टिकलाल तामाङ र सहकोषाध्यक्षमा संगीता मोक्तान, उपेन्द्र तामाङ, तारा तामाङ र मिलन तामाङ चयन हुनुभयो ।
कार्यक्रममा काभ्रे तेमाल गाउँपालिकाका आयुष तामाङ,रोशि ३ काभ्रेका दोर्जे थोकर तामाङ,कुमार लो तामाङ,रिना लोप्चन तामाङ,नमोवुध्द ६का राजुमान तामाङ,खाँडादेवि ७ का कान्छाराम तामाङ, दोरम्वा २ का अर्थमान तामाङ लगायत दुई दर्जन कार्यकर्ता नेकपा एमाले परित्याग गरी एकीकृत समाजवादीमा प्रवेश गर्नुभयो ।
भेलाले नवप्रवेशीहरूलाई उचित जिम्मेवारी दिने निर्णय गरेको छ । नवप्रवेशीलाई पार्टी अध्यक्ष तथा सम्माननीय पूर्व प्रधानमन्त्री माधवकुमार नेपालले खादा र टिका लगाएर स्वागत गर्नुभएको थियो ।
