विराटनगर । खोटाङ सामाजिक सेवा मञ्चद्वारा स्रष्टा केदारप्रसाद रेग्मी र वरिष्ठ साहित्यकार श्रीओम श्रेष्ठ ‘रोदन’ सम्मानित भएका छन् । शनिबार विराटनगरमा आयोजित एक भव्य समारोहमा दुवै साहित्यकारलाई सम्मान प्रदान गरिएको हो ।
नेपाली भाषा–साहित्यमा अविरल साधनारत ९५ वर्षीय रेग्मी तथा नेपाल स्रष्टा समाजका अध्यक्षसमेत रहेका वरिष्ठ साहित्यकार रोदनलाई प्रमुख अतिथि प्रा. कविराज न्यौपाने, मञ्चका अध्यक्ष कृष्णप्रसाद भण्डारी मार्सेलीलगायतले सम्मान गरे ।
उमेर र स्वास्थ्यका कारण कार्यक्रममा उपस्थित हुन नसकेका रेग्मीको तर्फबाट उनका पुत्र डा. उत्तमकुमार रेग्मीले सम्मान ग्रहण गरेका थिए । कार्यक्रमका क्रममा सम्मानित व्यक्तित्व रोदन र डा. रेग्मीले आ–आफ्नो मन्तव्य राखेका थिए ।
वि.सं. २०५४ मा स्थापना भएको खोटाङ सामाजिक सेवा मञ्चले नेपाली भाषा, साहित्य र कलाको उन्नयनमा योगदान पुर्याइरहेका व्यक्तित्वलाई सम्मान गर्दै आएको छ । उक्त अवसरमा प्रमुख अतिथि प्रा. न्यौपानेले अविछिन्न रूपमा सिर्जनामा सक्रिय स्रष्टालाई सम्मान गर्न पाउँदा खुशी लागेको बताए ।
कार्यक्रममा वरिष्ठ साहित्यकार बिवश पोखरेल, बलराम पोखरेल, महेश रेग्मी, प्रदीप सापकोटा लगायतले बधाई तथा शुभकामना व्यक्त गरेका थिए । यसअघि सम्मानित व्यक्तित्वहरूको परिचय साहित्यकार बाबुराम पोखरेलले प्रस्तुत गरेका थिए ।
कार्यक्रममा मधु पोखरेल, सरला चापागाईं, डा. देवी पन्थी, हरिप्रसाद बराल, हरि कट्टेल, पुष्पा सायरा, यमुना भट्टराई, दिङ्लाली कान्छोलगायत तीन दर्जनभन्दा बढी कवि तथा साहित्यकारले आफ्ना सिर्जना वाचन गरेका थिए ।
मञ्चका अध्यक्ष कृष्णप्रसाद भण्डारी मार्सेलीको अध्यक्षता तथा लक्ष्मी पोखरेलको सञ्चालनमा सम्पन्न कार्यक्रममा स्रष्टाहरूले समसामयिक दृष्ट्रिकोण, सामाजिक विकृति–विसङ्गतिको विरोध र उज्यालोका पक्षमा आफ्ना रचना प्रस्तुत गरेका थिए ।
