धुलिखेल/जिल्लाका कानुन ब्यवसायीहरुको संगठन काभ्रे जिल्ला बार इकाईको कार्तिक ३ गते हुने निर्वाचनमा अधिवक्ता हरिशरण दाहाल नेतृत्वको प्यानलका सचिव पदका उम्मेदवार नारायणध्वज तामाङको बिरुद्ध दाबि बिरोध उजुरी परेको छ।
तामाङका प्रतिद्वन्द्वी प्राणनाथ न्यौपानेले सचिव पदका उम्मेदवार तामाङको दोहोरो सदस्यता कायम भएको भनी उजुरी हालेकाे निर्बाचन समितिका संयोजक कृष्णप्रसाद सापकोटाले जानकारी दिनुभयो। उहाँका अनुुसार सचिवका उम्मेदवार तामाङको काभ्रे बार इकाइ र ललितपुर बार इकाइ दुवै जिल्लामा सदस्यता कायम भएकोले कानुनतः तामाङको उम्मेदवारी खारेज गरि पाउँ भनी दाबी विरोध दर्ता भएको छ । दाबी विरोध परेपछि छानबिनको प्रक्रियामा रहेको जानकारी निर्बाचन समितिका संयोजक सापकोटाले दिनुभयो
यसअघि काभ्रे बारका कोषाध्यक्ष रहेका सचिव पदका उम्मेदवार तामाङको काभ्रे बारमा २०८०/०८१ मा नबिकरणको क्रम संख्या ४३ रहेको छ भने ललितपुर बारमा नवीकरण क्रम संख्या २८० रहेको छ। १०१९६ लाइसेन्स नं. रहेका तामाङको बारको बिधानको दफा ५०/१ विपरित दोहोरो सदस्यता कायम भएकोले कानुन विपरीत भएको ठहर गर्दै उम्मेदवार खारेजीको माग गरेको जानकारी सचिवका उम्मेदवार प्राणनाथ न्यौपानेले दिनुभयो। न्यौपानेले आफ्ना प्रतिद्वन्द्वी तामाङप्रति व्यक्तिगत रुपमा कुनै पुर्वाग्रह नरहेको बताउँदै बहालवाला कोषाध्यक्षले दुइतिर सदस्यता नविकरण गर्ने कुरा नैतिकताको प्रश्न उठेको जिकिर गर्नुभयो।
एकीकृत समाजवादी निकट न्यौपानेले जयराम थापा प्यानलबाट सचिव पदमा उम्मदवारी दिनुभएको छ भने माओवादी केन्द्र निकट तामाङ हरिशरण दाहालको प्यानलबाट सचिव पदमा उम्मदवारी दिनुभएको छ।
