काभ्रेपलाञ्चोक – खानीखोला गाउँपालिकाले लक्षित समूहका सम्पूर्ण बालबालिकालाई आवश्यक खोप उपलब्ध गराउँदै आफूलाई "पूर्ण खोप सुनिश्चित पालिका" घोषणा गरेको छ।
गाउँपालिकाको सभा हलमा आयोजित विशेष कार्यक्रममा अध्यक्ष इन्द्रबहादुर थिङ ‘छिन्ताङ’, प्रमुख प्रशासकीय अधिकृत जीवनराज अर्याल, लेखा प्रमुख प्रकाश कोइराला, सामाजिक समितिका संयोजक तथा वडा नं ४ का अध्यक्ष निशान मोक्तान, अन्य वडाध्यक्षहरू, स्वास्थ्यकर्मीहरू र नागरिक समाजका प्रतिनिधिहरूको उपस्थितिमा यो घोषणा गरिएको हो।
गाउँपालिका स्वास्थ्य शाखाका प्रमुख राम पुकार यादवका अनुसार, खोप तालिकाअनुसार सबै लक्षित बालबालिकालाई खोप उपलब्ध गराइएको छ।
अध्यक्ष थिङले स्थानीय तहको नेतृत्व, समुदायको सक्रिय सहभागिता र स्वास्थ्यकर्मीहरूको निरन्तर प्रयासकै कारण यो उपलब्धि सम्भव भएको बताए। "खोप पहुँचबाट कोही पनि नागरिक वञ्चित हुन नपरोस् भन्ने उद्देश्यले अभियानलाई निरन्तरता दिनेछौँ," उनले प्रतिवद्धता व्यक्त गरे।
स्थानीय बासिन्दाहरूले पूर्ण खोप सुनिश्चित भएसँगै स्वास्थ्यप्रति विश्वास र आत्मविश्वास थपिएको महसुस भएको प्रतिक्रिया दिएका छन्।
