काठमाडौं । 'रावायण’ फिल्मको विवादमा अभिनेता अनमोल केसी पक्राउ परेका छन् । उपत्यका अपराध अनुसन्धान कार्यालय, काठमाडौंको टोलीले काभ्रेको साँगाबाट उनलाई साँझ साढे ५ बजे नियन्त्रणमा लिइएको हो ।
आपराधिक विश्वासघात गरेको आरोपमा पक्राउ परेको एसपी रवीन्द्र रेग्मीले बताए । रावायण नामक फिल्ममा भएको विवादलाई लिएर निर्माता समूहले केसीविरुद्ध आपराधिक विश्वासघातको कसुरमा किटानी जाहेरी दिएका थिए ।
निर्माण कम्पनी सुदर्शन थापा प्रोडक्सन प्रालिको तर्फबाट सुप्रिया भन्ने चन्द्रकला कटुवालले उजुरी दिएकी थिइन् । उक्त उजुरीको आधारमा अनमोलविरुद्ध केही दिनअघि पक्राउ पुर्जी जारी भएको प्रहरीले जानकारी दिए । प्रहरीले खोजी कार्य गर्दा सूचनाको आधारमा साँगाबाट पक्राउ गरिएको हो ।
केसीले फिल्म खेल्छु भनेर बैंक ट्रान्सफरमार्फत १० लाख रुपैयाँ लिएकाे तर, फिल्म खेल्न नमानेपछि प्रहरीकोमा गएको निर्माता पक्षले जानकारी दिए।
‘जाहेरी आएपछि धेरै पटक छलफलका लागि बोलाउँदा पनि नआएपछि पक्राउ पूर्जी जारी गरेर नियन्त्रणमा लिएकाे प्रहरीले बताए।’
