बनेपा/बनेपा नगरपालिका वडा नम्बर -६ को श्रीखण्डपुर मार्ग बिहिबारदेखि अनिश्चितकालका बन्द गरिएको छ ।
स्थानीय समुन्द्रकाजी श्रेष्ठ र उनका दाई थ्याङ्क्यु माइला श्रेष्ठले सडक स्तरोन्नतीको काममा अवरोध गरेको भन्दै उपभोक्ताहरुले सडक अनिश्तिकालका लागि बन्द गरिदिएका हुन् । उपभोक्ताहरुले बनेपा नपा वडा नम्बर ६ को कार्यालयमा समेत तालाबन्दी गरेका छन् ।
यसपछि स्थानीय प्रशासनले अनुगमन गरेको भएपनि समस्या समाधानको लागि पहलकदमी अहिलेसम्म कसैले नलिएको स्थानीय उपभोक्ता राजु मानन्धरले बताउनुभयो। स्थानीय प्रशासनले वडा कार्यालय खोल्न वडाध्यक्ष सचितानन्द के.सी.लाई दबाब दिइएको भएपनि आफु जननिर्वाचित प्रतिनिधि भएकोले जनताको भावना विपरित आफु जान नसकिने जवाफ दिइएको समाचार स्रोतको दाबी छ।
अनिश्चितकालीन रुपमा सडक अवरुद्ध भएपछि अहिले यो क्षेत्रका जनता प्रभावित भएका छन् ।
अहिले यो सडकमा बागमती प्रदेश सरकारले १८ लाख रुपैयाँ बजेट नियोजन गरेर ड्रेन निर्माणको काम थालिएको थियो । आफ्नो मात्रै जग्गामा सडक विस्तार गर्न लागेको भन्दै समुन्द्रकाजीको परिवारले पटक पटक अवरोध गरेपछि आक्रोसित उपभोक्ताले सडक बन्द गरिदिएका हुन् । तर बनेपा नगरपालिकाका प्राविधिक र वडाका प्राविधिकले सडकको बीच भागबाट दायाँबायाँ बराबर हुनेगरी नापजाँच गरिएको भएपनि आफ्नो मात्र जग्गा परेको भनी समुन्द्रको परिवारले उपभोक्ता समितिका पदाधिकारीलाई पैसाको बलमा कुनै प्रतिउत्तर समेत दिने अवसर नदिइ काम रोक्का गर्ने अन्तरिम आदेश जारी गर्न लगाएकाे स्थानीय उपभोक्ताहरुको आरोप छ।
उपभोक्ता समितिले समुन्द्रको परिवारको गतिविधिबारे वडा कार्यालय र नगरपालिकालाई समेत जानकारी गराउँदा पनि कुनै सुनुवाई नभएपछि सडक र वडा कार्यालय बन्द गर्न बाध्य भएको बताएको छ ।
बनेपाको गोदाम चोक–श्रीखण्डपुर मार्ग २०१५ सालमै खनिएको सडकको मापदण्ड ११ मिटर कायम गरिएको छ । उपभोक्ता समितिले सोही मापदण्डमा रहेर काम गर्दा समुन्द्रकाजीको परिवारले अवरोध गर्दै आएको हो ।
