धुलिखेल/नेकपा एमाले काभ्रेको ११ औ जिल्ला अधिवेशनबाट अध्यक्षमा राजन भुर्तेल निर्वाचित भएको छ। भुर्तेलले ३८० मत प्राप्त गर्दा उहाँका प्रतिस्पर्धी चन्द्र लामाले २९९ मत प्राप्त गर्नु भएको छ । कुल मतदाता संख्या ६ सय ८६ रहेको निर्वाचनमा ६ सय ७८ मत खसेको र ८ जना अनुपस्थित रहेको बताइएको छ ।
उपाध्यक्षमा भुर्तेल समूहका देवसागर लामाले ४७१ मत ल्याएर विजयी भएका छन् चन्द्र समूहका आत्मराम थापाले २०८ मत प्राप्त गर्नुभएको छ । सचिवमा भुर्तेल समूहका राजकुमार सापकोटाले ४४४ मत ल्याएर विजयी हुँदा चन्द्र समूहका होमप्रसाद चौलागाईंले २३५ मत ल्याउनु भएको छ ।
उप–सचिव (महिला) तर्फ भुर्तेल समूहकै सुर्यमाया दनुवारले ३६१ मत ल्याएर विजयी हुँदा चन्द्र समूहको पवित्रा भुर्तेलले २३८ मत ल्याउनुभएको छ भने उप सचिव (खुल्ला) तर्फ भुर्तेल समूहकै रत्नकुश रञ्जितकारले ३२४ मत ल्याएर विजयी हुँदा चन्द्र समूहका पुरुषोत्तम अधिकारीले १५३ मत ल्याउनुभएको छ । उपसचिव महिला तर्फ शान्ता न्यौपानेले ८० र पुरुष तर्फ हरि कुमार मैनालीले २०२ मत ल्याउनुभएको छ ।
५ जना पदाधिकारीका लागि १२ जनाको उम्मेदवारी परेको थियो । विद्यूतीय भोटिङ मेसिन प्रयोग गरेका कारण मत परिणाम छिटो आएको हो । अध्यक्षमा निर्वाचित भुर्तेल १० औं जिल्ला अधिवेशनमा सचिवमा निर्वाचित हुनुभएको थियो भने चन्द्र लामा उपाध्यक्षमा निर्वाचित हुनुभएको थियो ।
