बनेपा — काभ्रेपलाञ्चोकको महाभारत गाउँपालिकाले आर्थिक अनुशासन, वित्तीय पारदर्शिता र सुशासनमा उल्लेखनीय उपलब्धि हासिल गर्दै लगातार तेस्रो पटक ‘शून्य बेरुजु’ कायम गरेको छ।
महालेखापरीक्षकको कार्यालयको ६८औँ वार्षिकोत्सवका अवसरमा आर्थिक वर्ष २०८१/८२ को लेखापरीक्षणमा पनि बेरुजु शून्य कायम गर्न सफल भएको भन्दै गाउँपालिकालाई प्रशंसापत्रसहित सम्मान गरिएको हो।
महालेखापरीक्षकको कार्यालयका अनुसार गाउँपालिकाले आर्थिक अनुशासन, वित्तीय उत्तरदायित्व तथा पारदर्शिता प्रवर्द्धनमा प्रभावकारी कार्यसम्पादन गरेकाले उक्त सम्मान प्रदान गरिएको हो।
यस उपलब्धिसँगै महाभारत गाउँपालिका आर्थिक वर्ष २०८१/८२ सम्म लगातार तीन आर्थिक वर्ष शून्य बेरुजु कायम गर्ने देशकै पहिलो र एकमात्र स्थानीय तह बनेको छ।
गाउँपालिका अध्यक्ष कान्छालाल जिम्बाले यो उपलब्धिलाई सम्पूर्ण महाभारतवासीको साझा सफलताका रूपमा व्याख्या गरेका छन्। सामाजिक सञ्जालमार्फत प्रतिक्रिया दिँदै उनले नागरिकको विश्वास, सहयोग, सुझाव तथा रचनात्मक आलोचनाले गाउँपालिकालाई सुशासनको मार्गमा अघि बढाउन महत्वपूर्ण भूमिका खेलेको बताए। साथै जनप्रतिनिधि, कर्मचारी तथा सबै सरोकारवालाको समर्पण र सहकार्यप्रति उनले आभार व्यक्त गरेका छन्।
दुर्गम भौगोलिक अवस्था र सीमित स्रोत–साधनका बीच पनि वित्तीय सुशासन र जवाफदेहितामा महाभारत गाउँपालिकाले हासिल गरेको सफलता अन्य स्थानीय तहका लागि समेत प्रेरणादायी उदाहरण बनेको छ।
