रोशी । काभ्रेपलाञ्चोक जिल्लाको रोशी गाउँपालिका वडा नं. २ का स्थानीयबासिन्दालाई होमस्टे सम्बन्धी तालिम प्रदान गरिएको छ ।
राष्ट्रिय युवा परिषद् भक्तपुरको आर्थिक सहयोग तथा एकीकृत समाज विकास नेपाल ललितपुरको आयोजनामा यहाँका युवाहरुलाई कृषि पर्यटन प्रवद्र्धनको लागि होमस्टे सम्बन्धी तालिम प्रदान गरिएको हो ।
पाँच दिनसम्म सञ्चालन भएको तालिममा त्यहाँ १३ जना स्थानीय युवाहरुको सहभागिता रहेको थियो । कृषि पर्यटन, पर्यावरण पर्यटन, धार्मिक पर्यटनका साथै प्राकृतिक दृष्टिकोणले समेत भरिपूर्ण रहेको रोशीको २ नं. क्षेत्रलाई विकास गर्ने उद्देश्यले तालिमको आयोजना गरेको आयोजकले जनाएको छ ।
तालिममा सहजीकरण गर्दै होम–स्टे(घरबास) महासंघका केन्द्रिय कोषाध्यक्ष सुरज बास्तोलाले होम–स्टे सञ्चालन गर्दा ध्यान दिनुपर्ने विषय, कार्यविधि, सामुदायिक होम–स्टे, विधान र दर्ता प्रक्रियाको बारेमा जानकारी दिनुभएको थियो । सो क्रममा पकाउने कला, स्थानीय रैथाने बस्तुबाट विभिन्न खाद्य बस्तु तयार गर्ने विधि, खाना बनाउँदा ध्यान दिनुपर्ने कुराहरुको बारेमा प्रशिक्षण दिएका थिए । तालिममा सहभागीहरुले अब तत्कालै रोशीमा साुमदायिक होमस्टे दर्ता गर्ने जनाएको छ ।
रोशी गाउँपालिकाको वडा नं. २ स्थित् प्रसिद्ध तीनधारे झरना, महावीर झरना, रानी झरना, ऐतिहासिक गुम्बा, लक्ष्मीनारायाण महादेवको मन्दिर लगायतका प्राकृतिक एवं धार्मिक स्थलहरु रहेको ठाउँ हो ।
