दिनेश खरेल
चुनावी अभियानमा कसरी लागि रहनुभएको छ ?
हामी चुनावी अभियानमा छौ। घरदैलो गरिरहेका छौ। वडा वडामा चुनावी भेला र अन्तर्क्रिया भईरहेको छ। गठबन्धनका साथीहरु पनि लागिरहनुभएको छ।
तपाईंप्रति भूम्लुबासीको अपेक्षा के छ ?
सदरमुकामबाट नजिक भएर पनि भूम्लु पछाडि परेको छ। भूम्लुको बिकास गरी मुहार फेर्नु छ। गठबन्धनबाट युवाले अध्यक्षमा टिकट पाएको छ केही परिवर्तन गर्छ भन्ने आशा भूम्लुबासीमा रहेको छ।
भूम्लुको मुख्य समस्या के देख्नु भएको छ ?
भूम्लुमा महिला, जनजाति, दलित पछाडि परेको छन्। युवा बेरोजगारी बढ्दो छ। बिदेशमा जान बाध्य छन्। बिपक्षीले जल, जमिन, जङ्गलको दुरूपयोग गरिएको छ। खानेपानी, सडक सञ्जाल, स्तरीय शिक्षा र स्वास्थ्य नै ठूलो समस्या हो।
अध्यक्ष भएपछि तपाईंको योजना के छ ?
सबै वडालाई सडक सञ्जालमा जोड्नुक साथै १० वडालाई नमुना बगैंचामा रुपान्तरित गर्नेछु। खानेपानी तथा सरसफाईको लागि विग वाटर पोलुको अबधारणा ल्याएको छु। सामुदायिक विद्यालय मन्टेश्वरी कक्षा सञ्चालन गर्ने र समय अनुसार अङ्ग्रेजी भाषामा पठनपाठन गराउनेछु। युवालाई भूम्लु छाडेर अन्यत्र जानुपर्ने बाध्यता हुँदैन। महिला र युवाहरुको लागि स्वरोजगार सिप, शिक्षा र तालिमको उचित ब्यवस्था गर्नेछौ।
भूम्लुमा बारम्बार लालपुर्जाको बिषय चर्चामा आउँछ र त्यसै सेलाउँछ यो बिषयमा के भन्नु हुन्छ?
भूम्लुको सात र आठ नम्बर वडाका जनता लालपुर्जा विहिन छन्। यो बर्षौदेखिको समस्या हो। यो पेचिलो बिषय बन्दै आएको छ। अघिल्लो सरकारले केही प्रयत्न गरेको थियो तर पुरा गर्न सकेन। आगामी दिनमा हामी पुरा गर्ने प्रतिबद्धता व्यक्त गर्दछौ।
दोलालघाटको बालुवा गिट्टी उत्खननले नदि कुरूप भैसकेको छ। भोलि पर्यावरणमा असर पर्ने देखिन्छ। त्यसतर्फ केही ध्यान दिनु भएको छ?
हो वास्तवमा दोलालघाटको बालुवा गिट्टीको दुरुपयोग भैरहेको छ। यसले भौगोलिक जोखिम निम्त्याउने देखिन्छ। प्रकृतिको दुरूपयोग गरि केही सिमित माफियाहरूले कमाइरहेका छन्। त्यसलाई रोक्ने छौ र आम्दानीको स्रोत बढाई बिकासमा लगाउने छौ।
