काठमाडौं । नेपालका आठ वटा वामपन्थी दलबीच राजनीतिक एकता गर्ने सहमति भएको छ। शनिबार नेकपा (माओवादी केन्द्र) को पेरिसडाँडास्थित केन्द्रीय कार्यालयमा बसेको संयुक्त बैठकपछि एकता सम्बन्धी सहमति पत्रमा दलका शीर्ष नेताहरूले हस्ताक्षर गरेका हुन्।
हस्ताक्षर गर्ने नेताहरूमा माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा (एकीकृत समाजवादी) का अध्यक्ष माधवकुमार नेपाल, जनसमाजवादी पार्टी नेपालका अध्यक्ष सुवासराज काफ्ले, नेपाल समाजवादी पार्टीका अध्यक्ष महेन्द्र राय यादव, नेकपा महासचिव चिरन पुन, नेकपा समाजवादीका अध्यक्ष राजु कार्की, नेकपा (माओवादी समाजवादी) का अध्यक्ष कर्णजित बुढाथोकी र नेकपा (साम्यवादी) का अध्यक्ष प्रेमबहादुर सिंह रहेका छन्।
बैठकमा सहभागी दलहरूले साझा विचार, नीतिगत दिशा र संगठनात्मक एकता कायम गर्दै ‘एकीकृत वाम राजनीतिक शक्ति’ निर्माण गर्ने लक्ष्य लिएका छन्। सहमति पत्रमा समाजवाद उन्मुख लोकतान्त्रिक प्रणाली, सामाजिक न्याय, समानुपातिक समावेशिता र सुशासनका मूल्यमा आधारित नयाँ पार्टी निर्माण गर्ने उल्लेख गरिएको छ।
एकता प्रक्रियालाई संस्थागत गर्न ‘एकता राष्ट्रिय महाधिवेशन’ आयोजना गर्ने तयारी भएको बैठकमा बताइएको छ। साथै, एकीकृत पार्टीको नाम, चुनाव चिन्ह र संगठनात्मक संरचना निर्धारणका लागि विशेष कार्यदल गठन गरिने निर्णय भएको छ।
यसअघि नेकपा (एकीकृत समाजवादी) को केन्द्रीय समितिले माओवादी केन्द्रसहितका दलहरूसँग एकता गर्ने निर्णय गरेको थियो। त्यसको भोलिपल्ट माओवादी केन्द्रको स्थायी समितिले पनि सो प्रस्ताव अनुमोदन गरेको हो।
नेताहरूका अनुसार, वाम शक्तिहरूबीचको यो सहमति मुलुकमा राजनीतिक स्थायित्व र आर्थिक रूपान्तरणको दिशामा नयाँ प्रयासका रूपमा हेरिएको छ।
