काठमाडौं । विपक्षी दलको आज बसेको बैठक संसदको बैठक बोलाउन दबाब दिने निर्णय गदै संपन्न भएको छ ।
माओवादी केन्द्रको पहलमा बुधबार बिहान बसेको विपक्ष दलको बैठकले संसद बैठक बोलाउन सरकारलाई दबाब दिने निर्णय गरेको छ । सरकारले संसद बैठक बोलाउन आनाकानी गरेकोले विशेष अधिवेशनको माग गर्ने बारेमा छलफल भएको बताइउको छ । ‘छिटोभन्दा छिटो सदन चलाउ भन्ने । सरकारले संसद बोलाएन भने विशेष अधिवेशनका बोलाउन विपक्षी दल लाग्ने निर्णय भएको बैठकमा सहभागी रास्वपाका कार्यवाहक अध्यक्ष डि.पि. अर्यालले जानकारी दिए ।
‘सरकार संसद छलेर अध्यादेशबाट देश चलाउने तरिकाले अघि बढ्यो । सरकारको कदमको विरुद्धमा प्रतिपक्ष सबै दल एकवद्ध हुनुपर्छ भन्ने कुरा भयो । मुल्यवृद्धि नियन्त्रण हुन सकेन, अर्यालले भने,‘छिमेकसँगको सम्बन्ध बिगारेको बारे कुरा भयो । संसदीय समितिमा दुई तिहाइको सरकारले कोरम पु¥याउँदैन । अर्थतन्त्र झन् झन् कमजोर भयो । रास्वपा सभापति रवि लामिछाने माथि प्रतिशोध साधिएको धारणा सबै नेताले राखेको अर्यालले दाबी गरे ।
बैठकमा माओवादी केन्द्रबाट अध्यक्ष प्रचण्ड, नारायणकाजी श्रेष्ठ, वर्षमान पुन र शक्ति बस्नेत सहभागी थिए । एकीकृत समाजवादीका माधव कुमार नेपाल र बेदुराम भुसाल, रास्वपाका डीपी अर्याल, राप्रपाका बुद्धिमान तामाङ, आजपाका प्रभु साह तथा नेसपाका महिन्द्रराय यादव र गंगानारायण श्रेष्ठ सहभागी थिए ।
वपक्षी दलको संयुक्त वक्तव्य बनाउन नेकपा माओवादी केन्द्रका उपमहासचिव वर्षमान पुन र एकीकृत समाजवादीका उपाध्यक्ष बेदुराम भुषालले जिम्मेवारी पाएका छन् । बिहीबार बैठक बसेपछि संयुक्त वक्तव्य सार्वजनिक गर्ने आजको बैठकमा निर्णय भएको छ ।
