बनेपा । आजबाट दूईदिनसम्म भक्तपुरमा हुने बागमती प्रदेश अन्तर नगरपालिकास्तरिय आईटिएफ तेक्वान्दो प्रतियोगितामा बनेपाबाट छनौट भएका खेलाडीहरुलाई बनेपा नगरपालिकाले शुभकामनाका साथ विदाई गरिएको छ ।
बनेपा नगरपालिका प्रमुख शान्ति रत्न शाक्य र उपप्रमुख विमला सापकोटा दाहालले खेलाडी तथा टिमको नेतृत्व गरी जाने प्रशिक्षकलाई पुष्प गुच्छासहित टिका र खादा लगाएर विदाई गरेको हो । बागमती प्रदेश अन्तर नगरपालिकास्तरिय प्रतियोगिताको लागि काभ्रेको बनेपाबाट १४ जना खेलाडीहरु प्रतिस्पर्धाका लागि छनौट भएको काभ्रे आईटिएफ तेक्वान्दो एकेडेमीका अध्यक्ष एवं प्रशिक्षक राजमन्दिर श्रेष्ठले बताउनुभयो । भक्तपुरको गठ्ठाघरमा हुने प्रतियोगितामा प्रदेश भित्रका नगरपालिकाहरुको प्रतिनिधित्व गरेर आयोजना हुन लागेको प्रदेशस्तरीय अन्तर नगरपालिका आईटिएफ तेक्वान्दो प्रतियोगितामा काभ्रेबाट १४ जना खेलाडीहरुले फाईट र प्याट्रनमा प्रतिस्पर्धा गर्ने जानकारी दिनुभयो ।
यसअघिका विभिन्न प्रतियोगिताहरुमा राम्रो नतिजा ल्याउन सफल भएको बताउँदै उहाँले अहिले हुन लागेको प्रतियोगितामा पनि सफलता हासिल गर्नेमा विश्वस्त रहेको बताउनुभयो ।
बनेपा नगरपालिका प्रमुख शाक्य, उपप्रमुख दाहाल र प्रमुख प्रशासकीय अधिकृत भोला प्रसाद चापागाईले खेलाडीहरुलाई टिका, खादा र पुस्पगुच्छा प्रदान गरेर विदाई गर्दै प्रतियोगितामा सफलताको शुभकामना व्यक्त गर्नुभएको छ । प्रतियोगिता भोलि समापन हुनेछ ।
