दोलालघाट/भुम्लु गाउँपालिका अध्यक्ष प्रेम बहादुर भुजेल र वडा नम्बर ८ का वडा अध्यक्ष मोतिलाल तामाङमाथि दुर्वव्यबहारसहित सांघातिक आक्रमण भएको छ।
भुम्लु गाउँपालिका वडा नम्बर ८ सिस्नेरी बगर क्षेत्रमा अनाधिकृत रुपमा गिट्टी, बालुवा, ढुङ्गा उत्खनन् गरेको सुचना पाएपछि अनुगमनको लागि सो स्थानमा वडाध्यक्ष तामाङ र स्थानीय राम श्रेष्ठमाथि अवैध रुपमा नदी दोहन गर्नेहरुले घरेलु हातहतियार सहित चौतर्फी घेराबन्दी गरी आक्रमण गरेका हुन् । घटनाको जानकारी पाएपछि घटनास्थल पुगेका भुम्लु पालिका प्रमुखलाई पनि नियन्त्रणमा लिई आक्रमण गरेको बताइएको छ ।
अबैध रुपमा नदीजन्य पदार्थ उत्खनन् र चोरी पैठारी भएको स्थानीयबाट सूचना पाए पश्चात् उक्त स्थानमा अनुगमन गर्न जानेक्रममा घरेलुु हातहतियार सहित सुनियोजित तरिकाले तस्करहरुले घेराबन्दी गरि हातपात गर्दै नियन्त्रणमा लिएको घटनाप्रति भुम्लु गाउँपालिकाको ध्यानाकर्षण भएको प्रमुख प्रशासकिय अधिकृत देवेन्द्र सुवेदीले जारी गरेको प्रेस विज्ञप्तिमा उल्लेख छ।
उक्त घटना निन्दनीय र खेदजनक रहेको बताउँदै घटनामा संलग्न अपराधीहरुलाई कानुनी दायरामा ल्याउन सम्बन्धि निकायलाई अपिल गर्दछौं,–विज्ञप्तिमा भनिएको छ ।
सिन्धुपाल्चोक र काभ्रेको विवादित सिमा क्षेत्रको नदीमा अवैध रुपमा नदी दोहन भइरहेको क्षेत्रमा अनुगमनमा जाने क्रममा गाउँपालिका प्रमुख प्रेमबहादुर भुजेल र आफुमाथि नियोजित रुपमा आक्रमण गरेको भुम्लु गाउँपालिका–८ का वडाध्यक्ष मोतीलाल तामाङ्गले जानकारी दिनुभयो । स्थानीय सुरक्षा निकायबाट कुनै सहयोग नपाएको गुनासो समेत उहाँले गर्नुभयो । यस अघिपनि पटक पटक आक्रमण हुँदै आएकोले दोषीलाई कारवाहीको दायरामा ल्याउनुपर्ने मागसहित बिहीबार स्थानीय प्रशासनलाई ध्यानाकर्षण पत्र बुझाउने कार्यक्रम रहेको जानकारी वडाध्यक्ष लामाले दिनुभयो ।
