काठमाडौं । नेपाली कांग्रेसको आधिकारिकता दाबी गर्दै शेरबहादुर देउवा पक्षका नेताहरूले निर्वाचन आयोगमा दिएको ध्यानाकर्षणप्रति गगन थापा नेतृत्वको कांग्रेसले आपत्ति जनाएको छ।
विशेष महाधिवेशनबाट निर्वाचित नेतृत्वको तर्फबाट महामन्त्री गुरुराज घिमिरेले विज्ञप्ति जारी गर्दै देउवा पक्षका गतिविधिप्रति गम्भीर आपत्ति जनाएका हुन्।
घिमिरेका अनुसार नेपाली कांग्रेसको ऐतिहासिक विशेष महाधिवेशन सफलतापूर्वक सम्पन्न भइसकेको छ र त्यसबाट निर्वाचित केन्द्रीय कार्यसमितिको विवरणसहित आवश्यक सबै कागजात निर्वाचन आयोगमा बुझाइसकिएको छ। यस्तो अवस्थामा केही महाधिवेशन प्रतिनिधिको संख्या फिर्ताको विषय उठाइनु तर्कहीन र भ्रम सिर्जना गर्ने प्रयास भएको उनको भनाइ छ।
उनले तत्कालीन कार्यबाहक सभापतिले निर्वाचन आयोगमा पुगेर उठाएका विषयहरूले पार्टीको विधि, विधान र महाधिवेशनको मर्ममाथि प्रश्न उठाउने काम गरेको उल्लेख गरेका छन्।
महामन्त्री घिमिरेले देउवा नेतृत्वको गतिविधिप्रति सात बुँदामा आपत्ति जनाउँदै ती क्रियाकलापले पार्टीलाई कमजोर बनाउने र लोकतान्त्रिक अभ्यासविरुद्ध जाने दाबी गरेका छन्।
उनले निर्वाचन आयोगलाई तथ्य र विधानका आधारमा निर्णय गर्न आग्रह गर्दै विशेष महाधिवेशनबाट निर्वाचित नेतृत्व नै नेपाली कांग्रेसको वैधानिक नेतृत्व भएको स्पष्ट पारेका छन्।
