बनेपा।नेकपा (एकीकृत समाजवादी)ले सार्वजनिक गरेको स्थानीय तह निर्वाचन घोषणापत्रमा गाउँगाउँमा सहकारी, घरघरमा रोजगारी कार्यक्रम अगाडि सारेको छ । ३० वैशाखमा हुने स्थानीय तह निर्वाचनका लागि घोषणापत्र सार्वजनिक गरेको छ ।
मंगलबार राष्ट्रिय सभागृहमा आयोजित कार्यक्रममा अध्यक्ष माधवकुमार नेपालले घोषणापत्र सार्वजनिक गरेका हुन् ।
सहकारी अभियानलाई अर्थतन्त्रको प्रमुख क्षेत्रमध्ये एउटा बनाएर लानुपर्ने घोषणापत्रमा उल्लेख छ ।
पार्टी अध्यक्ष नेपाल प्रधानमन्त्री भएको बेला ‘गाउँगाउँमा सहकारी, घरघरमा रोजगारी’ भन्ने अभियान अभियान सुरु गरेकाले त्यसैलाई निरन्तरता दिने पार्टीको घोषणापत्रमा उल्लेख गरिएको छ ।
घोषणापत्रमा भनिएको छ, संविधानले समाजवाद उन्मुख अर्थतन्त्र निर्माणका लागि तीन खम्बे अर्थनीति अपनाएर जानुपर्ने दिशानिर्देश गरेको छ ।
जस अन्तर्गत सार्वजनिक सरकारी, सहकारी र निजी क्षेत्र पर्दछन् । सहकारी अभियानलाई अर्थतन्त्रको प्रमुख क्षेत्रमध्ये एउटा बनाएर लैजानुपर्दछ भन्ने कामको शुरुवात ‘गाउँगाउँमा सहकारी, घरघरमा रोजगारी’ भन्ने अभियान माधवकुमार नेपाल प्रधानमन्त्री भएको समयमै अगाडि बढाइएको थियो ।
