काठमाडौं / वैशाख ३० गते हुन गइरहेको स्थानीय निर्वाचनको सन्दर्भमा काठमाडौंमा रहनुभएका धुलिखेलबासीहरूसंग गठबन्धनको तर्फबाट धुलिखेल नगरपालिकाको लागि नगर प्रमुख उम्मेदवार दयासागर श्रेष्ठ र उपप्रमुख उम्मेदवार निराजन जंगमसंग साक्षात्कार कार्यक्रम संपन्न भयो ।
कार्यक्रममा प्रमुख अतिथि नेकपा एकीकृत समाजवादीका पोलिटव्युरो सदस्य कृष्ण प्रसाद सापकोटाले आसन्न निर्वाचनको सन्दर्भमा देशमा ‘अहिले दुईवटा गठबन्धन भएको भन्दै दुईमध्ये प्रगतिशील वाम–लोकतान्त्रिक गठवन्धन रोज्नुपर्ने बताउनु भएको छ । सापकोटाले बर्तमान सन्दर्भमा प्रगतिशील वाम–लोकतान्त्रिक र अर्काे दक्षिणपन्थीहरुको गठबन्धन भएको भन्दै ‘दक्षिणपन्थी गठबन्धनको नेतृत्व एमाले अध्यक्ष केपी ओलीले गरेको बताउनु भयो । ओलीले नेतृत्व गरेको गठबन्धनमा प्रतिगामी र राजावादीहरु रहेको भन्दै उनीहरु परिवर्तन र संविधान विरोधी रहेको भन्दै प्रगतिशील लोकतान्त्रिक वामपन्थी गठबन्धनको पक्षमा मतदान गरेर प्राप्त राजनीतिक उपलब्धी जोगाउन, संविधान जोगाउने, समाजवाद सुशासन र गणतन्त्रका हिमायती प्रगतिशील गठबन्धनमा रहेकाले सत्ता गठबन्धनका उम्मेदवारहरूलाई मत दिएर सुशासनको पक्षमा उभिन सार्वजनिक अपिल गर्नुभएको छ ।
नगर प्रमुखका उम्मेदवार श्रेष्ठले धुलिखेल नगरपालिकालाई सुन्दर नगरपालिका बनाउन सकिने भन्दै गठबन्धन देशका लागि आवश्यक भएकाले सोहीअनुसार गठबन्धनप्रति विश्वास गर्न आग्रह गर्दै भ्रष्टाचार र कुशासनमा आफुहरु नफस्ने बताउनु भयो ।
कार्यक्रममा उपमेयरका उम्मेदवार निराजन जंगम, नेकपा माओवादीका धुलिखेल पनौती इन्चार्ज भरत लामिछाने, बडा नं. ६ का अध्यक्ष संजय कोजू, बडा न.ं ७ का अध्यक्ष दीपेन्द्र देवजु लगायतले आफ्नो विचार राख्दै गठबन्धन उम्मेदवारको पक्षमा मतदान गर्न अनुरोध गर्नुभयो ।
