काठमाडौं । रसुवाको गोसाइँकुण्ड गाउँपालिका–२ स्थित रसुवागढी क्षेत्रमा आज बिहान आएको भोटेकोशी नदीको बाढीमा फसेका ९ जनाको सकुशल उद्धार गरिएको छ।
नेपाली सेना, नेपाल प्रहरी र सशस्त्र प्रहरी बलको टोलीले संयुक्त रुपमा उद्धार कार्य सम्पन्न गरेको हो। रसुवाका सहायक प्रमुख जिल्ला अधिकारी ध्रुवप्रसाद अधिकारीका अनुसार उद्धार गरिएका सबै नेपाली नागरिक हुन्।
उनले थप जानकारी दिँदै भने, “बाढीका कारण हालसम्म ९ नेपाली नागरिकको उद्धार गरिएको छ। ८ जना चिनियाँ नागरिक, तीन जना प्रहरी र अन्य केही व्यक्ति भने अझै बेपत्ता छन्। एक जना प्रहरी भने नदीको बीचभागमा सुरक्षित अवस्थामा रहेको भन्दै सम्पर्कमा आएका छन्।”
बाढीले नेपाल–चीन सीमा जोड्ने मुख्य पुल बगाएको छ भने रसुवागढी जलविद्युत् आयोजना, भन्सार कार्यालय र अन्य भौतिक संरचनामा पनि ठूलो क्षति पुर्याएको छ।
साथै, सुख्खा बन्दरगाहमा पार्किङ गरिएको ७ वटा इभी (इलेक्ट्रिक) गाडीसमेत बाढीले बगाएको प्रहरीको भनाइ छ। हाल प्रभावित क्षेत्रमा उद्धार तथा खोजी कार्य तीव्र रूपमा जारी रहेको छ।
