काभ्रेपलाञ्चोक– विशेष सुराकीको आधारमा लागूऔषध नियन्त्रण व्यूरो कोटेश्वर र अस्थायी प्रहरी पोष्ट काभ्रेभञ्ज्याङबाट खटिएको संयुक्त प्रहरी टोलीले काभ्रेपलाञ्चोकको धुलिखेल नगरपालिका–११, बाझोखेतस्थित बीपी राजमार्ग सडक खण्डबाट ब्राउन सुगरसहित दुई जनालाई पक्राउ गरेको छ।
बिहान करिब ५ः४५ बजे भकुण्डेबेशीबाट धुलिखेलतर्फ आइरहेको मे.१ च. ३५९७ नम्बरको स्कारपियो गाडी शंका लागि रोक्दा लागूऔषध बरामद भएको प्रहरीले जनाएको छ। गाडीमा सवार इलामको रोङ गाउँपालिका–३ निवासी ३२ वर्षीय सुमन राई र गाडी चालक इलामकै माई नगरपालिका–१ आँपटारी निवासी २७ वर्षीय तेज कुमार वराईलीलाई प्रहरीले नियन्त्रणमा लिएको हो।
प्रहरीका अनुसार, सुमन राईको साथमा रहेको निलो झोलाभित्र लुकाइएको अवस्थामा ‘WILD STONE’ लेखिएको कागजको खोल र त्यसभित्र कालो प्लास्टिकमा प्याक गरिएको खैरो हिरोइन (ब्राउन सुगर) फेला परेको थियो। उक्त पदार्थको तौल नेट ९ ग्राम १७० मिलिग्राम रहेको बताइएको छ।
पक्राउ परेका दुवैजनालाई साथमा बरामद गरिएको लागूऔषध र स्कारपियोसहित म्याद थप गरी थप अनुसन्धान भइरहेको जिल्ला प्रहरी कार्यालय काभ्रेपलाञ्चोकले जनाएको छ। काभ्रेपलाञ्चोक जिल्ला अदालतबाट म्याद थप गरी पाँच दिनको थुनामा राखी अनुसन्धान अघि बढाइएको छ।
