गणेश आचार्य
बेथान्चोक/ काभ्रेपलान्चोक जिल्लाको बेथान्चोक गाउँपालिका–१, अल्कापुरिका गोविन्द तिमल्सिना (चमेली बा)को दोस्रो रेकर्डेड मौलिक लोकदोहोरी गीत ‘चमेली–२’ शुक्रबार सार्वजनिक गरिएको छ।
राजेन्द्र भण्डारीको शब्द सिर्जना, गोविन्द तिमल्सिनाको मौलिक लय तथा नारायण दङ्गालको संगीत संयोजनमा तयार गरिएको यस गीतमा गोविन्द तिमल्सिना (चमेली बा), प्रतिमा अर्याल र राजेन्द्र भण्डारीको सुमधुर स्वर रहेको छ।
गीतको म्युजिक भिडियो ओमप्रकाश अवस्थीले छायांकन तथा सम्पादन गरेका हुन्। भिडियो काभ्रेको बेथान्चोक गाउँपालिका–१ झिँगेडाँडा र अल्कापुरि आसपासका क्षेत्रमा छायांकन गरिएको हो। भिडियोमा स्थानीय बासिन्दा, जनप्रतिनिधि, ग्रामीण जनजीवन, कृषि र पर्यटनका विविध पक्षलाई प्राथमिकताका साथ प्रस्तुत गरिएको छ।
ग्रामीण भेगमा रहेका वृद्ध अवस्थाका लुकेका प्रतिभा गोविन्द तिमल्सिना (चमेली बा)को दैनिकी र जीवनशैलीलाई दृश्यमा उतार्ने प्रयास गरिएको सर्जक राजेन्द्र भण्डारीले अरनिको टाइम्सलाई जानकारी दिए।
‘चमेली–२’ को म्युजिक भिडियो राजेन्द्र भण्डारीको युट्युब च्यानलमार्फत सार्वजनिक गरिएको हो।
