काठमाडौं । प्रेममान डंगोलको संस्कृति सम्बन्धी कृति ‘चित्रमय चाडपर्वको देश : नेपाल’ लोकार्पित भएको छ। राजधानीमा मंगलवार आयोजित कार्यक्रममा डा. पुरुषोत्तम लोचन श्रेष्ठ, श्रीओम श्रेष्ठ ‘रोदन’, प्रा. डा. लक्ष्मण प्रसाद गौतम, शितल गिरी लगायतका स्रष्टाहरूले पुस्तकको संयुक्त रूपमा विमोचन गरे।
कार्यक्रममा कृतिमाथि टिप्पणी गर्दै डा. श्रेष्ठले भने, “नेपाल मण्डलको संस्कृति विश्वकोशजस्तै हो। यसै विषयमा नयाँ–नयाँ तथ्य समेटिएको यो कृति महत्वपूर्ण छ। संस्कृति मरे देश नै मर्छ, त्यसैले प्राचीन सांस्कृतिक चिनारी सबैका हातमा पुग्नुपर्ने पुस्तकमध्ये यो एक हो।”
अर्का चर्चाकार शितल गिरीले कृतिले नेपाल मण्डल बुझ्न सहयोग पुर्याउने बताए। उनका अनुसार, “आफ्नै भाषा, संस्कृति र चाडपर्वसँग जोडिएका विविध पक्षबारे पुस्तकले समग्र जानकारी दिने भएकाले यसले विशेष महत्व वहन गर्छ।”
कार्यक्रममा बोल्दै नेपाल स्रष्टा समाजका अध्यक्ष श्रीओम श्रेष्ठ ‘रोदन’ले पुस्तकले संस्कृतिलाई सबैसँग जोड्ने कार्य गर्ने बताउँदै भने, “यो कृतिले संस्कृति र चाडपर्वको परम्परालाई जीवन्त राख्न मद्दत पुर्याउँछ।”
नेपाल स्रष्टा समाज, केन्द्रीय कार्य समितिको आयोजनामा सम्पन्न कार्यक्रममा कृतिकार डंगोलले आफ्नो लेखकीय मन्तव्य व्यक्त गरेका थिए। कार्यक्रमको सञ्चालन रञ्जना निरौला र स्वागत तारा सुबेदीले गरेका थिए।
