बनेपा । सरकारले सभामुख अग्नि सापकोटालाई संसदमा एमसिसी टेबल गर्न आग्रह गरिसकेको अवस्थामा संसदमा टेबल हुने र नहुने अन्योल बढेर गएको छ। प्रतिनिधि सभाको बैठक भोलि माघ २६ गते बुधबार बस्दैछ । बैठकअघि बुधबार बिहान सभामुख सापकोटाले कार्यव्यवस्था परामर्श समितिको बैठक डाक्ने तयारी गरिरहेका छन्।
सभामुख सापकोटालाई कानुन मन्त्री दिलेन्द्र बडुले भेटेरै प्रतिनिधि सभा बैठकमा एमसिसी टेबल गर्न आग्रह गरिसकेको अवस्था छन्। सभामुख सापकोटाले संसदमा एमसिसी टेबल गर्न वातावरण बन्नुपर्ने बताउँदै आएका छन् । सभामुख सापकोटाको सचिवालयका अनुसार संसदमा अवरोध र नाराबाजीबीच प्रतिनिधि सभा बैठकमा एमसिसीको छलफल हुने वातावरण छैन भन्ने सभामुखको धारणा हो, संसदमा सरकारले ल्याएको बिजनेस अगाडि नबढाउने भन्ने हुँदैन ।
सभामुखले कार्यव्यवस्थामा एमसिसीको विषय सरकारले प्रवेश गराए प्रमुख प्रतिपक्षी दल नेकपा एमालेले गरेको अवरोधलाई कारण देखाउने अवस्था छ। प्रतिनिधि सभा बैठकमा नेकपा एमालेले इतिहासकै सबैभन्दा लामो समयदेखि अवरोध गर्दै आएको छ। एमालेले सभामुखको राजीनामा वा नेकपा एकीकृत समाजवादी पार्टीका सांसदलाई बैठकबाट निकाल्नुपर्ने माग गर्दे आएको छ। दुबै माग पूरा हुने अवस्था प्रतिनिधि सभामा विद्यमान छैन ।
