धुलिखेल/जिल्ला प्रशासन कार्यालय काभ्रेको पहलमा काभ्रे जिल्लामा विभिन्न मितिमा घोषणा गरिएका शहिदहरुको विवरण अध्यावधिक गर्ने काम संपन्न भएको छ ।
नेपाल सरकार मन्त्री परिषद् निर्णय अनुसार नेपाल राजपत्रमा प्रकाशन गर्ने प्रयोजनका लागि गृहमन्त्रालयमा रहेको विवरणमा त्रुटी भएको नभएको यकीन गरी त्रुटी भएको पाइएमा सच्याउनुपर्ने विवरण सहित सिफारिश माग भइ आएको थियो । गृहमन्त्रालयमा रहेको विवरणमा निकै त्रुटी रहेको र आधा भन्दा बढी शहिदहरुको नाम विवरणमा उल्लेख नभएको अवस्थामा जिल्लास्थित दलका प्रतिनिधिहरुको उपस्थितिमा त्रुटी सच्याउनुका साथै थप विवरण पठाउन सिफारिश गरेको छ ।
गृहमन्त्रालयले पठाएको विवरणमा जम्मा १ सय ४५ जनाको मात्र नाम समावेश भएको र त्यसमा पनि कतिपयको नाम दोहोरिएको पाइएको प्रमुख जिल्ला अधिकारी पुन्य विक्रम पौडेलले जानकारी दिनुभयो । प्रजिअ पौडेलका अनुसार दोहोरिएको नाम काटिनुका साथै नेपाल सरकारबाट परिवारले राहत समेत बुझि लिएका शहिदहरुको विवरणमा छुटेका १ सय ५२ जनाको नाम थप गरि गृहमन्त्रालय पठाइएको छ । शहिद विवरण छानबिन तथा छुटेका नाम थप गर्न नेपाली कांग्रेसका जिल्ला प्रतिनिधि समिर ब्याञ्जु, एमालेका हरि मैनाली, एकीकृत समाजवादीका हरिगोपाल प्रधानाङ्गा, माओवादी केन्द्रका दैवलाल घिसिङ(अनुशिल) लगायत विभिन्न दलका प्रतिनिधिको उपस्थिति रहेको थियो ।
विवरण सच्याउने र छुटेकाहरु थप गर्न जिल्लाका मानव अधिकारकर्मी भोजराज तिमल्सिनाले सहजिहरण गर्नु भएको थियो । जिल्लामा अझै छुटपुट हुन सक्ने भएकाले आवश्यक आवश्यक कागजात सहित आए पछि समावेश गर्दै जाने निर्णय पनि भएको जानकारी प्रजिअ पौडेलले दिनुभयो ।
शहीदहरुको विवरण इपेपरमा हेर्न सक्नुहुनेछ ।
