काभ्रे । नेपालको संविधान दिवसको अवसरमा बनेपाको चारदोबाटोमा शुक्रबार साँझ नेपाल कम्युनिष्ट पार्टी (नेकपा) माओवादी केन्द्रको भातृ संगठन योंग कम्युनिष्ट लिग (वाइसीएल) नेपाल काभ्रेपलाञ्चोक र अखिल क्रान्तिकारी काभ्रेको आयोजनामा संयुक्त दीप प्रज्वलन कार्यक्रम सम्पन्न गरेका छन्।
कार्यक्रमका प्रमुख अतिथि नेकपा माओवादी केन्द्रका केन्द्रीय सदस्य तथा पूर्व ऊर्जा राज्यमन्त्री सुर्यमान दोङ (लालध्वज) रहेका थिए। उनले संविधान दिवसलाई ऐतिहासिक दिनको रूपमा स्मरण गर्दै वर्तमान संविधानले मुलुकलाई संघीय लोकतान्त्रिक गणतन्त्रको नयाँ यात्रामा अघि बढाएको उल्लेख गरे। नेता दोङले महान जनयुद्धका सहिद, जनआन्दोलन र जेनजी आन्दोलनमा ज्यान गुमाउने वीर सहिदहरूलाई श्रद्धाञ्जली अर्पण गर्नुका साथै घाइते योद्धाहरूको शीघ्र स्वास्थ्यलाभको कामना गर्नुभयो।
कार्यक्रममा नेकपा माओवादी केन्द्रका काभ्रे जिल्ला इन्चार्ज तेजबहादुर मिजार, पूर्व सांसद गंगाबहादुर दोङ, सांसद रुकु चौलागाईंसहित पार्टीका पदाधिकारी, युवा तथा विद्यार्थी नेता र स्थानीय सर्वसाधारणको उल्लेखनीय उपस्थिति थियो।
जनस्तरमा दीप प्रज्वलनमार्फत मनाइएको यो कार्यक्रमले नेपाली जनताको बलिदान र संघर्षप्रतिको सम्मान झल्काएको छ। यस्ता अवसरहरूले संविधानको महत्व सम्झाउने मात्र नभई भावी पुस्तामा लोकतान्त्रिक मूल्य र सामाजिक न्यायप्रतिको प्रतिबद्धता थप सुदृढ गर्ने अपेक्षा गरिएको छ।
