काठमाडौं । नेपाली कांग्रेसका सभापति शेरबहादुर देउवाले निर्वाचनको मुखमा पार्टीको महाधिवेशन आयोजना गर्दा आन्तरिक प्रतिस्पर्धाले चुनावी परिणाममा नकारात्मक असर पार्न सक्ने चिन्ता व्यक्त गरेका छन् ।
मंगलबार केही सञ्चारकर्मीहरूसँगको अनौपचारिक कुराकानीमा देउवाले यस्तो सुझाव यसअघि नै पार्टी नेतृत्वलाई दिइसकेको उल्लेख गरे । तर महाधिवेशन अघि नै गर्ने निर्णय भए आफू त्यसमा अवरोध नबन्ने पनि उनले स्पष्ट पारे ।
आफू १५औँ महाधिवेशनमा सभापतिको उम्मेदवार नहुने भएकाले तटस्थ भूमिकामा रहने देउवाको भनाइ थियो । विधानअनुसार पुनः सभापतिमा उम्मेदवार बन्न नमिल्ने र व्यक्तिगत रूपमा पनि इच्छा नभएकाले अन्य नेताहरूलाई अघि बढ्न प्रोत्साहन मात्र गर्ने उनले बताए ।
महाधिवेशन निर्वाचनअघि गरिँदा पार्टीभित्रको प्रतिस्पर्धाले संगठन कमजोर हुन सक्ने भन्दै उनले सावधानी अपनाउनुपर्ने धारणा राखे । यद्यपि, नेतृत्व तहले नै अघि बढ्ने निर्णय गरे आफूले रोक्ने कुनै कारण नरहेको उनको भनाइ थियो ।
देउवाले विशेष महाधिवेशन आयोजना गर्ने सम्भावना भने पूर्ण रूपमा अस्वीकार गरे । विशेष महाधिवेशनमा गए त्यसको प्रक्रिया, विधि र स्वरूपमै फेरि विवाद उत्पन्न हुने भएकाले त्यसतर्फ नजाने उनले स्पष्ट पारे । नियमित महाधिवेशन भने आपसी सहमतिमा सम्पन्न गर्न सकिने उनको धारणा थियो ।
