काठमाडौँ । जेन्जी मुभमेन्ट नेपालले गहिरो राजनीतिक तथा संरचनागत सुधार नगरी अघि बढाइने निर्वाचन प्रक्रिया अस्वीकार्य हुने स्पष्ट चेतावनी दिएको छ । आन्दोलनका क्रममा ७६ जना नागरिकको ज्यान गएको र तीन हजारभन्दा बढी व्यक्ति अङ्गभङ्ग वा गम्भीर घाइते भएको उल्लेख गर्दै मुभमेन्टले ती बलिदानलाई केवल निर्वाचन मिति सार्ने विषयसँग जोडेर हेर्न नहुने जनाएको छ ।
आन्दोलनका प्रवक्ता विजय शाहद्वारा जारी प्रेस वक्तव्यमा जनाइएको छ कि जेन्जी विद्रोह राज्यको कमजोर शासन प्रणाली, विकृत निर्वाचन संरचना, दण्डहीनता र जनविरोधी शासकीय अभ्यासविरुद्ध उठेको ऐतिहासिक प्रतिरोध थियो । वक्तव्यमा ती घटनालाई २०८४ मा तय गरिएको निर्वाचनलाई २०८२ मा सार्ने सीमित प्रयोजनसँग जोडेर बुझ्नु गलत हुने दाबी गरिएको छ ।
मुभमेन्टले संविधान पुनर्लेखन, शासकीय स्वरूप र निर्वाचन प्रणालीको आमूल परिवर्तन, सार्वजनिक संस्थाहरूको व्यापक पुनर्संरचना तथा आन्दोलनका क्रममा भएको दमनमा संलग्न व्यक्तिहरूमाथि कानुनी कारबाही हुनुपर्ने माग अघि सारेको छ । साथै, विगत तीन दशकदेखि देश दोहन गर्ने भ्रष्ट र लुटतन्त्रका मुख्य पात्रलाई न्यायको कठघरामा नल्याएसम्म निर्वाचनको नैतिक औचित्य नहुने भनिएको छ ।
यी आधारभूत राजनीतिक र संवैधानिक विषयलाई बेवास्ता गर्दै बलपूर्वक निर्वाचन प्रक्रिया अघि बढाइए त्यसबाट उत्पन्न हुने सम्पूर्ण परिणामको जिम्मेवारी राज्यका सम्बन्धित निकायहरूले नै वहन गर्नुपर्ने चेतावनी वक्तव्यमा दिइएको छ ।
जेन्जी मुभमेन्ट नेपालले निर्वाचन आयोगका आयुक्त, पदाधिकारी तथा कर्मचारीहरूलाई जनअभिमतविपरीत कुनै पनि निर्णय लिँदा त्यसको सामूहिक मात्र नभई व्यक्तिगत उत्तरदायित्वसमेत रहने उल्लेख गरेको छ । त्यस्ता निर्णयहरू भविष्यका न्यायिक र राजनीतिक प्रक्रियामा गम्भीर रूपमा मूल्याङ्कन हुने पनि चेतावनी दिइएको छ ।
वक्तव्यमा जनताको सहमति, न्याय र संरचनागत रूपान्तरणबिनै निर्वाचन अघि बढाइए देशव्यापी शान्तिपूर्ण प्रतिरोधका कार्यक्रम सञ्चालन गरिने जनाउँदै त्यसबाट सिर्जना हुने राजनीतिक, सामाजिक र संस्थागत परिणामको जिम्मेवारी सम्बन्धित निकायहरूकै हुने स्पष्ट पारिएको छ ।
आज निर्वाचन आयोगमा समानुपातिक तर्फको बन्दसूची पेश गर्ने अन्तिम दिन रहेको सन्दर्भमा उक्त चेतावनी सार्वजनिक गरिएको हो ।
