काठमाडौं। नेपाली कांग्रेसको विशेष महाधिवेशनमा आइतबार राति ९ बजेसम्म २ हजार ६ सय ६२ जना महाधिवेशन प्रतिनिधि सहभागी भएका छन्। पार्टीका अनुसार सो संख्याका प्रतिनिधिहरूले हालसम्म नाम दर्ता गराइसकेका छन्।
आइतबार उद्घाटन सत्र सम्पन्न भइसकेको छ भने महाधिवेशनको बन्दसत्र सोमबार बिहान १० बजेदेखि सुरु हुने कार्यक्रम छ। नेता युवराज पाण्डेयले कुल प्रतिनिधिमध्ये ५६.१२ प्रतिशतको सहभागिता भइसकेको जानकारी दिए।
प्रदेशगत रूपमा हेर्दा सबैभन्दा धेरै प्रतिनिधि मधेश प्रदेशबाट ४४६ जना सहभागी भएका छन्। त्यसपछि बागमती प्रदेशबाट ४३२, कोशीबाट ४२५, लुम्बिनीबाट ३९८, गण्डकीबाट २९६, सुदूरपश्चिमबाट १५८ र कर्णाली प्रदेशबाट १३४ जना प्रतिनिधि सहभागी भएका छन्।
यस्तै, काठमाडौं उपत्यकाबाट १७८ जना प्रतिनिधि सहभागी हुँदा भ्रातृ संस्था, सुभेच्छुक तथा जनसम्पर्क समितिबाट १ सय ९५ जना महाधिवेशनमा सहभागी भएका छन्।
देशभर नेपाली कांग्रेसका कुल ४ हजार ७ सय ४३ जना महाधिवेशन प्रतिनिधि रहेकामा हालसम्म २ हजार ६ सय ६२ जनाको उपस्थिति दर्ता भएको हो। नाम दर्ता गर्ने क्रम अझै जारी रहेको पार्टीका एक नेताले बताए।
