काठमाडौं । सुनकोशी वाङ्मय प्रतिष्ठानले सवारी साधनमा प्रयोग हुने इम्बोष्ट नम्बर प्लेट अंग्रेजी भाषामा राख्ने सरकारी निर्णयको पुनर्विचार गर्न आग्रह गरेको छ।
प्रतिष्ठानका अध्यक्ष छविरमण सिलवाल र महासचिव प्रदीप सापकोटाले संयुक्त हस्ताक्षरमा जारी विज्ञप्तिमा भनिएको छ– “नेपालभित्र दर्ता भएका सवारी साधनमा अंग्रेजी नम्बर प्लेट राख्ने निर्णयले नेपाली भाषाको अवमूल्यन हुन्छ। सरकारी कामकाजकै भाषा भएको नेपालीलाई उपेक्षा गर्नु अस्वीकार्य छ। यो निर्णय सच्याउनुको विकल्प छैन।”
विज्ञप्तिमा नेपालको संविधानको धारा ७ अनुसार सरकारी कामकाज देवनागरी लिपिमा लेखिने स्पष्ट प्रावधान रहेको स्मरण गराउँदै नेपाली भाषा र संस्कृतिलाई उपेक्षा गर्ने निर्णयले लोपोन्मुख बनाउने खतरा औंल्याइएको छ।
प्रतिष्ठानले सवारी साधनमा राखिने नम्बर प्लेट देवनागरी लिपिमा अनिवार्य राख्ने व्यवस्था मिलाउन सरकारलाई आग्रह गरेको छ।
