काठमाडौं — नेपाली कांग्रेसको आधिकारिकतासम्बन्धी विवाद चुलिँदै जाँदा शेरबहादुर देउवा पक्ष र गगन थापा पक्षका नेता–कार्यकर्ता निर्वाचन आयोगको कार्यालय अगाडि आमनेसामने भएका छन्। जमलस्थित कान्तिपथमा रहेको आयोग परिसर वरपर दुवै पक्षले नाराबाजी र धर्ना दिएका हुन्।
गगन थापा नेतृत्वको कांग्रेसका कार्यकर्ता दिउँसोदेखि नै आयोग परिसरमा उपस्थित भई धर्नामा बसेका थिए। उनीहरूले हालै सम्पन्न विशेष महाधिवेशनबाट निर्वाचित केन्द्रीय कार्यसमितिलाई आधिकारिकता दिन माग गरेका छन्।
त्यसको केही समयपछि शेरबहादुर देउवा पक्षका नेता तथा कार्यकर्ता पनि आयोग परिसर पुगेका छन्। देउवा पक्षले कुनै विशेष महाधिवेशन नभएको दाबी गर्दै आफूहरू नै वैधानिक नेपाली कांग्रेस भएको दाबीका साथ नाराबाजी गरेका छन्। उक्त समूहको नेतृत्व तरुण दल अध्यक्ष विद्वान गुरुङले गरेका थिए।
दुवै पक्षका कार्यकर्ताले निर्वाचन आयोगसमक्ष आ–आफ्नो विवरण अध्यावधिक गर्न निवेदनसमेत दिएका छन्। यसैक्रममा दुवै समूहले आज आयोगका पदाधिकारीसँग छलफल पनि गरेका छन्।
दुवै पक्षका समर्थकको उपस्थिति बढ्दै गएपछि आयोग परिसर र आसपासको क्षेत्रमा सुरक्षा व्यवस्था कडा पारिएको छ। सम्भावित तनावलाई मध्यनजर गर्दै ठूलो संख्यामा प्रहरी परिचालन गरिएको छ।
