बनेपा/जिल्ला प्रहरी कार्यालय काभ्रेका विशेष टोलीले अनैतिक गतिविधि चलाउने बनेपा नगरपालिकामा रहेको विभिन्न होटलमा छापा मारेको छ । टोलीले होटलमा छापा मारी अनैतिक गतिविधि गराउने ३ जना सञ्चालकलाई पक्राउ गरेको बताइएको छ ।
पक्राउ पर्नेमा बनेपा नगरपालिका वडा नम्बर १० मा रहेको अरनिको होटल एण्ड गेष्ट हाउसका संचालक ४९ बर्षिय गोकुल पराजुली, बनेपा नगरपालिका वडा नम्बर ७ स्थित चिया खाजा होटल पसल व्यबसाय गर्ने ४१ बर्षिय चन्चला महत र बनेपा नगरपालिका वडा नम्बर ८ मा क्याफे होटल सञ्चालन गर्ने ४२ बर्षीय मनमाया तामाङ रहेका छन् ।
उनीहरूले सामाजिक बिकृती विसंगती फैलाउने तथा समाजिक मर्यादामा खलल पार्ने खालका अनैतिक गतिबिधिहरु गराउँदै आएको प्रहरीको दाबी छ ।
बनेपा नगरबासीको गुनासो सम्बोधन गर्ने क्रममा विभिन्न स्थानमा सञ्चालन गरिएका होटलहरुमा चेक जाँच गर्दा तीनलाई नियन्त्रणमा लिईएको जिल्ला प्रहरी कार्यालय काभ्रेले जनाएको छ ।
वडा नम्बर १० पुलबजारमा अरनिको होटल एण्ड गेष्ट हाउस, वडा नम्बर ७ गोदामचोकमा नाम नराखिएको चिया नास्ता खाजा घर र वडा नम्बर ८ बसपार्क पछाडी नाम नराखिएको क्याफे तथा होटलका सञ्चालकलाई अनैतिक व्यबसायमा संलग्न भएको आरोपमा कानुन बमोजिम नियन्त्रणमा लिई कानूनी कारबाही अगाडी बढाईएको प्रहरीले जनाएको छ ।
बनेपाको तरकारी बजार आसपासका केही गेष्ट हाउसहरुमा पनि यस्ता गतिविधि सञ्चालन हुने गरेको जनगुनासो आउने गरेको छ ।
