काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले जनयुद्धको ऐतिहासिक महत्व आत्मसात् गर्दै संविधानलाई अझ प्रगतिशील बनाउनुपर्नेमा जोड दिएका छन्।
शुक्रबार पार्टी कार्यालयमा संविधान दिवसका अवसरमा आयोजित कार्यक्रममा सम्बोधन गर्दै उनले जेनजी आन्दोलनका कारण यसपटकको संविधान दिवस फरक ढंगले मनाइरहेको बताए। ‘११ औँ संविधान दिवस हामी विशेष तरिकाले मनाउँदै छौँ,’ उनले भने, ‘जेनजी आन्दोलनका कारण उत्पन्न नयाँ राजनीतिक परिस्थितिका बीचमा मनाइएको यो दिवस मौलिक र विशेष छ।’
पूर्वप्रधानमन्त्रीसमेत रहेका प्रचण्डले संविधान निर्माणसम्म पुग्न झन्डै ७० वर्ष लामो संघर्ष र विभिन्न आन्दोलनहरू पार गर्नुपरेको उल्लेख गरे। उनले जनयुद्धलाई ऐतिहासिक तथ्य र उचाइका रूपमा आत्मसात् गर्नुपर्ने बताए।
उनका अनुसार संविधान निर्माण अत्यन्तै चुनौतीपूर्ण र जटिल प्रक्रिया थियो। ‘दलित, महिला, मधेसी, कर्णालीदेखि मेची–महाकालीसम्मको पहिचानसहितको संविधान बनाउन राजनीतिक शक्तिहरू तयार थिएनन्,’ उनले स्मरण गरे। ठूला दलहरूको अहङ्कारकै कारण आजको अवस्था सिर्जना भएको उनको भनाइ थियो।
संविधान निर्माणका क्रममा आफूले ठूलो दबाब र धम्की खेप्नुपरेको दाबी गर्दै प्रचण्डले थपे, ‘त्यसवेला ठूला भनिने पार्टीका नेताहरूलाई प्रधानमन्त्री अफर गरेर संविधान घोषणा गर्ने वातावरण बनाउनुपरेको थियो। यदि मैले त्यस्तो नगरेको भए के हुन्थ्यो भन्ने कुरा अहिले पनि मेरो दिमागमा घुमिरहन्छ।’
उनले भनेजसरी संविधान बनाउन पाएको भए आज जेनजी पुस्ताले आन्दोलन गर्नुपर्ने अवस्था आउनु नपर्ने विश्वास व्यक्त गरे।
