बेथानचोक (काभ्रे)।
प्रतिनिधि सभा सदस्य निर्वाचन २०८२ नजिकिँदै जाँदा काभ्रेपलाञ्चोक प्रतिनिधि सभा निर्वाचन क्षेत्र नं. २ की नेपाली कम्युनिस्ट पार्टी (नेकपा) की उम्मेदवार बसुन्धरा हुँमागाईले मतदातासँग प्रत्यक्ष भेटघाट सुरु गर्नुभएको छ।
आइतबार बेथानचोक गाउँपालिका–१ च्याम्राङवेशीका विभिन्न गाउँबस्तीमा पुगेर उहाँले घरदैलो कार्यक्रममार्फत मतदातासँग संवाद गर्दै आगामी निर्वाचनमा साथ र समर्थनको आग्रह गर्नुभएको हो।
घरदैलो अभियानको सुरुआत बेथानचोक गाउँपालिका–४ मा रहेको पार्टीको वडा कार्यालय उद्घाटनबाट गरिएको थियो। त्यसपछि टोलीले पार्थलीमा भेटघाट कार्यक्रम सञ्चालन गरेको थियो भने ढुंखर्कमा वडा नं. २ को पार्टी कार्यालय उद्घाटन गरिएको छ। सोही क्रममा वडा नं. १ च्याम्राङवेशीमा पनि पार्टीको वडा कार्यालय उद्घाटन गरिएको जनाइएको छ।
उम्मेदवार हुँमागाईको नेतृत्वमा रहेको टोलीले वडा नं. १ का झिंगे, फुर्केथलीलगायत सबै गाउँबस्तीमा पुगेर स्थानीय मतदातासँग छलफल गरेको थियो। भेटघाटका क्रममा स्थानीयवासीले यसपटक तारा चिन्हमा मतदान गर्ने सहमति भएको बताउँदै समर्थन जनाएका छन्।
घरदैलोका क्रममा मतदाताहरूले आ–आफ्ना गाउँटोलका समस्या, आवश्यकता र अपेक्षाबारे उम्मेदवारसमक्ष जानकारी गराएका थिए।
यसैबीच, नेपाली कम्युनिस्ट पार्टी काभ्रेपलाञ्चोकको निर्वाचन क्षेत्र नं. २ अन्तर्गत बुधबार सम्पन्न भेला तथा बैठकले पार्टी केन्द्रीय सदस्य टोकबहादुर वाइवाको संयोजकत्वमा निर्वाचन परिचालन मूल समिति गठन गर्ने निर्णय गरेको छ। उक्त समितिमार्फत क्षेत्रभरि निर्वाचन अभियानलाई थप सक्रिय बनाइने जनाइएको छ।
